بِسْمِ اللهِ الرَّحْمنِ الرَّحِيْمِ
Bismillâĥirrohmânirrohîm
اَللّهُمَّ صَلِّ عَلى سَيِّدِنَا مُحَمَّدٍ اَللّهُمَّ صَلِّ عَلَيْهِ وَسَلِّمْ
Allôĥumma Sholli Âlâ Sayyidinâ Muhammad, Allôĥumma Sholli Âlâyĥi wa Sallim
صَلِّ وَسَـــلِّمْ دَائِــــمًا عَلَى احْمَدَ
وَاْلآلِ وَاْلأَصْحَابِ مَنْ قَدْ وَحَّدَ
1
Dua puluh rupa nu ngaruksak solat
Ulah dilakukeun sanajan saliwat
Sering dilakukan pasti bakal gawat
Sabab bisa henteu ditarima solat
2
Nu kahiji hadas rek leutik rek gede
Dihaja jeung henteu eta sarua bae
Hadas leutik diberesihkeun ku wudu
Hadas gede diberesihkeun ku adus
3
Dua antel najis baseuh atawa garing
Kana pakean atawa awak urang
Tilu muka orat kalayan dihaja
Lamun teu dihaja sok tutup harita
4
Kaopat nyarita kalayan dihaja
Sanajan sahurup bari ngandung makna
Kalima loba usik terus-terusan
Atawa ngagerakeun sakabeh badan
5
Nu kagenep mengkol tina arah kiblat
Kecuali ukur beungeutna nu solat
Tujuh sakur nu ngabatalkeun puasa
Saeutik dahar nginum bari dihaja
6
Dalapan dahar atawa nginum loba
Sanajan dilakukeuna teu dihaja
Kasalapan tiap rupa pagawean
Ngaluarkeun sora sanajan sarupa
7
Saperti seuri ceurik jeung humaregung
Oge ngarenghos dedehem jeung marurung
Mun beresin batuk heuayna direka
Eta sarua ngabatalkeun solatna
8
Kasapuluh motong hiji rupa rukun
Pagawean solat nu geus jadi tangtu
Saperti rusuh cengkatna tina ruku
Samemeh tumaninah anggota ruku
9
Kasabelas ngahaja nambahan rukun
Saperti nambah sujud atawa ruku
Kecuali pikeun ma’mum anu masbuk
Nu teu bisa bareng imam dina ruku
10
Dua belas manjangkeun bari dihaja
Kana babacaan dina i’tidalna
Leuwih ti fatihah jeung dina diukna
Antara dua sujud dilila-lila
11
Nu katilu belas husus pikeun ma’mum
Tinggaleun dua rukun tina imamna
Opat belas oge husus pikeun ma’mum
Miheulaan dua rukun ti imamna
12
Nu kalima belas mah bahaya pisan
Nyaeta murtad kaluar tina Islam
Genep belas tembong sabagian suku
Pikeun jalma nu solatna disapatu
13
Tujuh belas ragu-ragu dina niat
Naha ieu solat naonna teu inget
Dalapan belas niat kaluar solat
Samemeh salam nu jadi ahir solat
14
Salapan belas tuluy-tuluyan ragu
Rek kaluar solat ta henteu teu tangtu
Bari solatna masih keneh dilaku
Sabab kagoda setan jeung hawa nafsu
15
Nu kadua puluhna mah ganti niat
Nyaeta ti niat fardu kana sunat
Maka solat farduna teh can dianggap
Geus dilakukeun sabab diganti niat
16
Tah eta perkara nu ngaruksak solat
Kudu diapal jeung kudu terus inget
Mun solatna puraga tanpa kadenda
Kudu sieun bilih Gusti teu narima
Baca juga NADOM PERTELAAN MA’RIFAT